احمد عز الامبراطور الحديدي

بما ان ( عمرو اديب ) اخذ اجازة الصيف فاضطريت اتفرج على (تامر امين )

اهو نتابع برضو و فى الفاصل الاعلانى اعلنوا عن برنامج ( دقو المزاهر ) و اللى

هيقدمه ( محمود سعد ) فكرة البرنامج ان كل يوم فى فائز و الجائزة شقة

يعنى 30 شقة خلال شهر رمضان المفاجاة كانت انا لراعى للبرنامج دة شركة

( عز الدخيلة ) الظاهر ان الامبراطور الحديدى حس بينا و بمشكلة الاسكان

عندنا فقرر بطريقته اللى كلها طيبة و انسانية يساعدنا لكن بطريقة مهذبة

عشان ميجرحناش طبعا يا جماعة انتوا فاكرينه ايه دة برضو انسان و مصرى

زينا عشان نبطل ظلم و افترى عليه شفته رغم كل مشاكله و مصاريفه

المتلتلة بيفكر فينا دة التزاماته كتير بنزين العربية و التبس بتاع السايس

الا بالمناسبة هى عربية الامبراطور مصفحة مصنوعة من الحديد ولا من

ايه ما علينا و دة غير النفقة اللى اكيد بيدفعها لمطلقته (شاهيناز النجار )

اصلها فقرية مش وش نعمة حد يسيب الملاك دة هى الخسرانة

ساعة الاعلان حسيت اد ايه انى كنت سيئة النية و ظلمته الرجل بيفكر

من دلوقتى انه يطلع زكاة رمضان من بدرى ما دى تعتبر زكاة و لو مش

مصدقين اسالوا المفتى هيقول ان ال 30 شقة دول زكاة طبعا ايوة و ممكن يقول

ان الامبراطور تسقط عنه الفريضة لان مصاريفه كتير لزوم البرستيج و الوجاهة

بتوع المجلس و اللى اكدلى انى ظلمت الامبراطور انه اعترف ( لمنى الشاذلى )

فى برنامج العاشرة مساء انه لا يعرف حجم ثروته اد ايه هو انسان بسيط

و اخر همه الفلوس و دلوقتى عرفت اننا كنا ظالمين لما اتهمناه بالاحتكار

و رفع سعر الحديد دة كله عشان يرجعهولنا تانى

السؤال دلوقتى لما الامبراطور مش عارف حجم ثروته بيطلع الزكاة ازاى

المفروض ان الزكاة هى ربع العشر من المبلغ الاساسى اكيد الامبراطور

بيطلعها بالبركة و دة فى مصلحتنا بيطلعها بالزيادة يا رب يغلى الحديد كمان

وكمان عشان الثروة تكبر و خير الامبراطور يعم علينا و يغرقن

اللهم زيده من عندك و وسع رزقه و احميه من شر الحاسدين

و الظالمين و ابعد عنه كيد الناس و سوء الظن بيه

و دلوقتى انا هروح الحق ادور على اى عريس عشان الحق شقة من 30 شقة

لان مش فاضل غير 26 يوم على الشهر الكريم .